雖然安國倫同柏寶將會缺席新馬季既首日賽事,但各界唔單止無失望,反而寄予厚望,因為兩者將會於2011年9月11日遠赴日本出戰「人馬錦標」,屆時安國倫將會策騎(4)綠色駿威,而柏寶將會策騎(13)天久,兩隻皆屬方嘉柏馬廊。

安國倫一向深得香港馬迷歡心,之前曾經受傷被迫休息幾個月,所以今次出戰日本定必全力以赴。

至於講到柏寶,一年又一年咁輸畀韋達,年年都食佢塵,亦意味住佢將要就策略上作出調整。

今次方嘉柏咁重視「人馬錦標」,證明佢銳意擴充版圖,唔會只針對香港。而方嘉柏本人既樂天精神,亦致使佢於各項比賽中都極具競爭力,另一方面亦展示出佢好勝既決心。

老實講,落得場,邊個想輸?

講完一堆介紹,咁究竟「2011人馬錦標」將會係點?

日本賽馬其實絕唔容易,其中一個重點係唔少騎師都鍾意帶頭,而且仲係由頭帶到尾,所以留前鬥後既策略必需計算得相當精準先至湊效;換句話說,留前鬥後既策略用於日本賽場好有風險。

我地相信(13)天久極有機會贏出「2011人馬錦標」,但一如前文所述,日本係一個競爭性極強既賽場,(13)天久絕對唔會輕鬆。假如係1400米或以上既賽事,我地可以更加放心,但今次係講緊1200米。

中國諺語:「站著說話不腰疼。」我地冷眼旁觀講是講非總係容易。

「主場」總會有利,「2010人馬錦標」贏家(14)衝鋒駿驥相信會被捧為熱門,因為無論係馬匹本身,以及騎師、練馬師,都對賽道瞭如指掌。

有一點大家需要注意,假如今次(14)衝鋒駿驥贏出,將可贏得5000萬日元獎金,折合約為500萬港元,你話佢會唔會搏?

(7)聖卡羅將會係呢場馬既另一選擇,不過(4)綠色駿威似乎令人唔敢抱太大期望。唔係話要完全抹殺(4)綠色駿威既可能性,畢竟上年佢對(14)衝鋒駿驥亦步亦趨既情景仍然歷歷在目,但就今年黎講,我地亦只係以事論事。

除左(13)天久之外,(1)榮進快足、(8)東海奧秘、(5)飛鷹雄風、以及(12)榮進亮白都應該頗有機會。

預計今次將會係一場激烈賽事,提提大家,比賽時間為2011年9月11日,香港時間14:35開跑,參賽馬匹總共為十五隻。

無論最後結果如何,相信今次一定會鬥得難分難解。